Convocatoria: participa como voluntario nos plantíos forestais dos Mtes. de Teis

A Asociación Fontaíña foi invitada, un ano máis, pola Comunidade de Montes de Teis (Vigo) a participar nos plantíos de árbores autóctonas que organiza dita entidade nos seus montes.
A C.M.V.M.C. de Teis leva moitos anos traballando a prol da recuperacións dos bosques autóctonos galegos mediante un proxecto continuo de eliminación das especies invasoras (sobre todo acacia negra) que inzaban os seus montes, e posteriormente repoboar con árbores autóctonas (carballos, cerdeiras, bidueiras,...) cuns resultados espectaculares.

Como pequeno apoio a esta fenomenal tarefa imos participar cun grupo de voluntarios nos dous plantíos de árbores autóctonas que organizará a Comunidade de Montes de Teis.

As actividades terán lugar nos montes de Teis os sábados 20 e 27 de febreiro de 2016 de 9:45 a 13h. O lugar de encontro será o Quiosco do Zoo (Praza dos Leóns, A Madroa, Vigo).  As persoas voluntarias poderán participar nunha ou nas dúas plantación segun desexen. A actividade estará aberta a menores de idad, sempre que asistan acompañados dun adulto responsable deles. Haberá un grupo de monitores de Fontaíña para axudar e supervisar no traballo dos participantes, ós que se lles entregará lubas, ferramenta e arboriñas. Recoméndase ir con roupa comoda e axeitada para traballar no monte. 
Para participar é obrigatorio inscribirse (o prazo finaliza o día 17 de febreiro as 20h) mandando un correo electrónico a fontainhavigo@yahoo.es ou chamando ó 679457222, indicando:
Nome e apelidos
Teléfono de contacto
E.mail
Idade, no caso dos menores.

Agardamos a túa participación¡

Plantadas 200 landras de cerquiño para o noso proxecto forestal

Na mañán do 31 de xaneiro de 2016, catro voluntarios de Fontaíña prepararon un pequeno viveiro de cerquiños.  Para iso, plantaron as landras en envases e agora habera que esperar un par de anos para que, cos coidados axeitados, poidan ser trasplantados a algunha zona forestal da costa das Rías Baixas.

VINDEIRA ACTIVIDADE: OBRADOIRO DE PLANTÍO DE LANDRAS EN BRICKS

O domingo 31 de xaneiro pola mañá, de 11 a 13 horas, terá lugar un obradoiro para plantar as landras de cerquiño (Quercus pyrenaica) que recollimos no mes de setembro e que mantivemos estratificadas en frío ata agora. Plantarémolas en bricks baleiros que reutilizaremos como macetas.

O obxectivo desta actividade é obter plantas de cerquiño para logo plantar nalgún espazo natural, polo que ao final do plantío aquelas persoas voluntarias que teñan un lugar axeitado para o desenrolo das arboriñas, poderán convertirse en “pais adoptivos” e coidalas ata entón.

Lugar de encontro e material necesario: Praia da Fontaíña (perto da do Vao) no lugar do Breadouro. No caso de que xa as recibiran, os/as voluntarios/as deberán traer as súas lubas.

O número de prazas é limitado (10 persoas) e poderán participar adultos e nenos (acompañados por un adulto).

Nesta actividade os e as participantes estarán acompañados por monitores da asociación Fontaíña.

É recomendable levar roupa e calzado cómodos.

As persoas interesadas deben apuntarse mediante o envío dun correo electrónico a fontaínhavigo@yahoo.es indicando nome, teléfono e, no caso dos menores, idade.

Os censos de aves, reportaxe do Atlántico Diario

No seguinte enlace tedes un artigo, publicado no Atlántico Diario, sobre os censos de aves que realiza a asociación Fontaíña.

ENLACE REPORTAXE ATLÁNTICO DIARIO

Xornadas de ornitoloxía: grazas a todos¡

Desde a Asociación Fontaíña queremos darlle as grazas a todalas persoas (conferenciantes, público, organizador, Lar do Queixa) que participaron nas Xornadas de Ornitoloxía. Saiu todo á perfección.

Próxima actividade: Censo de aves

O vindeiro sábado 2 de xaneiro pola mañá (de 9 a 13 h.) realizarase a XII edición censo de aves invernantes do treito costeiro que vai dende Cabo de Mar (Alcabre) ata a Praia de Baluarte (Coruxo), pasando pola Xunqueira do Lagares.

O lugar de encontro será en Cabo de Mar (no extremo leste do paseo de Samil) as 9:00 h.

O número de prazas é limitado (7 voluntarios/as).

Nesta actividade os e as participantes irán acompañados por un ornitólogo da asociación Fontaíña e axudarán a identificar e a contar as aves acuáticas que se atopen no seu percorrido. Dita información serve para coñecer o estado ambiental deste treito de costa en xeral e das poboacións de aves acuáticas do mesmo en particular.

Co gallo do X aniversario desta actividade, en 2015 leváronse a cabo diferentes actividades relacionadas coa ornitoloxía como charlas, excursións,... das que tivéchedes máis información neste blogue. Dende a Asociación Fontaíña queremos dar as grazas a todas as persoas que colaboraron nestas actividades en particular e nas actividades de voluntariado da asociación en xeral.

As persoas interesadas teñen que apuntarse no correo electrónico diegodalimia@gmail.com indicando o número de teléfono e se se precisan prismáticos.

É recomendable levar prismáticos e roupa e calzado cómodos para camiñar.

2005-2015 Remata a celebración do X Aniversario dos censos de aves acuáticas da Asociación Fontaíña

O vindeiro xoves 17 de decembro a partires das 20:30 h. en O Lar do Queixa (Heraclio Botana, 6, Vigo) terá lugar a oitava actividade de celebración do X Aniversario dos censos de aves acuáticas da Asociación Fontaíña. Desta volta trátase da palestra “Observación de aves no esteiro do Miño” que será impartida por un membro de Anabam, Asociación Naturalista do Baixo Miño.

As actividades de celebración rematarán o 26-12-15 cun roteiro de día completo polo esteiro do Miño. A actividade será guiada polo monitor de ornitoloxía da asociación. A inscripción é obrigatoria enviando un correo electrónico a diegodalimia@gmail.com indicando o número de teléfono e se se dispón de prismáticos ou non (de non telos facilitaremos uns).

Quedaremos na estación de autobuses de Vigo ás 10:15 h. (porta da Avda. de Madrid) para chegar a Salcidos sobre as 11:45 h., hora na que comezaremos a camiñar polo esteiro onde xantaremos (cada quen debe levar bebida e xantar). Despois de disfrutar de aves como a aguia peixeira (Pandion haliaetus), o mergullón de pescozo negro (Podiceps nigricollis) ou o carrán cristado (Thalasseus sandvicensis), colleremos o bus de volta ás 18 h. para estar sobre as 19:30 h. en Vigo de novo.

Recoméndase levar roupa e calzado cómodo, e chuvasqueiro. O número de prazas é limitado.

Dende a asociación Fontaíña queremos dar o noso máis fondo agradecemento a todas as persoas que fixeron posible que se levaran a cabo estas actividades e ás persoas que participaron nas mesmas. Moitas grazas a tod@s ;-)