Curso de Voluntariado: A restauración ecolóxica: unha ferramenta para a conservación do medio natural.

A Asociación Fontaíña oferta un curso gratuíto que pensamos vai ser de grande interese para as persoas voluntarias de actividades de medio ambiente.

Título do curso: A restauración ecolóxica: unha ferramenta para a conservación do medio natural.

Profesor: Diego Rodríguez Vieites, biólogo e Máster en Restauración de Ecosistemas.

Dirixido a: persoas interesadas no voluntariado ecolóxico (con ou sen experiencia). Interesados/as en inscibirse deben enviar un correo electrónico a fontainhavigo@yahoo.es cos seguintes datos (nome e apelidos, teléfono de contacto e, e se é o caso, entidade de voluntariado coa que se está a colaborar)

Datas : Teoría: 9-11-13 pola mañá (10 a 13 h.) e 16-11-13 pola mañá (10 a 13 h.). Práctica: 23-11-13 pola mañá e primeira hora da tarde (de 9 a 17h).

Duración: 12h (6 h. de fase teórica e 6h. de fase práctica).

Nº de prazas: 20 alumnos/as.

 Temática:

- Parte teórica: Celebrarase no Centro Cívico Municipal de Teis (Camino Maceiras s/n, 36207 Vigo, Tfno- 986 266 030) no curso abordaranse os diferentes aspectos que engloba a restauración de ecosistemas de maneira que se tratarán as seguintes unidades temáticas:

• Degradación ambiental e restauración de ecosistemas.
• A importancia do medio natural e da paisaxe de cara á restauración.
• Como abordar un proxecto de restauración.
• Restauración de ecosistemas mariños e litorais.
• Restauración de ecosistemas forestais.
• Restauración de ecosistemas lacustres e fluviais.
• Restauración de hábitats para a fauna e poboacións.
• Restauración de solos.
• Restauración de espazos afectados por actividades extractivas e obra civil.

- Parte práctica: Saida ás 9h e chegada ás 17h (Lugar de saida e chegada, se comunicara durante o curso).  Transporte en autobús por conta da Asociación Fontaíña. A fase práctica consistirá en realizar unha visita ó proxecto de restauración forestal levado a cabo pola Asociación Ridimoas (Ourense).

 

Ó remate do curso entregarase diploma de asistencia ós alumnos (asistencia mínima 80%)  e unha guía do proxecto de recuperación do bosque da Asociación Ridimoas.

PATROCINA:

Participamos na II Semana de Custodia do Territorio nas Mariñas Coruñesas e Terras do Mandeo

O membro da Asoc. Fontaíña Diego Rodriguez Vieites participou nun foro da II Semana de Custodia do Territorio nas Mariñas Coruñesas e Terras do Mandeo, organizada pola Asociación de Desenvolvemento Rural Mariñas–Betanzos, xunto coa Fundación Fragas do Mandeo, cunha ponencia titulada "De praias degradadas a dunas protexidas".

Próxima actividade de voluntariado ecolóxico: Censo de aves

O vindeiro domingo 8 de setembro, pola mañán (de 9 a 13h) se realizará o censo de aves en paso posnupcial do tramo de costa que vai dende Cabo de Mar ata Toralla, pasando pola Xunqueira do Lagares.

O lugar de encontro será en Cabo de Mar (no extremo leste do paseo de Samil) as 9:00h.

O número de prazas é limitado (7 voluntarios/as)

Nesta actividade os participantes irán acompañados por un ornitólogo e axudarán a identificar e contar as aves que se atopen no seu percorrido. Dita información sirve para coñecer o estado medioambiental deste tramo de costa.
As persoas interesadas teñen que apuntarse no tfno 679457222 ou por correo electrónico fontainhavigo@yahoo.es (é recomendable levar prismáticos e roupa e calzado cómodo para camiñar)

Patrocinadores 2013

A Fundación Biodiversidad, dependente do Ministerio de Agricultura, Alimentación y Medio Ambiente do Gobierno de España apoiará, a través da convocatoria 2013 do Programa Playas, Voluntariado y Custodia o proxecto "Voluntariado ecoloxico en praias da ría de Vigo" da Asociación Fontaíña cunha axuda económica de 3.000€.




Voz Natura, o concurso organizado pola Fundación Santiago Rey Fdez-Latorre, La Voz de Galicia e Radio Voz, seleccionou o proxecto presentado por Fontaíña e aportará unha axuda económica de 668€ durante o curso escolar 2012-13.

Asociación Fontaíña participou no I Foro de Restauración Ecolóxica Creando Redes.

A Asociación Fontaíña estará presente no I Foro de Restauración Ecolóxica Creando Redes, a celebrar os días 4 e 5 de xullo de 2013  . 
Podedes ver o programa do foro cliqueando no seguinte enlace: 

Programa do I Foro de Restauración Ecolóxica 

Nas seguintes liñas exponse un resumo da ponencia a presentar "20 años de restauración en A Fontaiña: de espacio degradado a zona dunar protegida" :
"El proyecto de restauración de las dunas de la playa de A Fontaíña (Coruxo, Vigo) comienza en el año 1993 en un ecosistema dunar con un elevado grado de degradación y se prolonga hasta nuestros días para pasar a convertirse en Espacio Natural de Interés Local. El hecho de ser pioneros en restuaración dunar en Galicia implicó numerosas dificultades de diferente naturaleza que se fueron superando con éxito hasta consolidar este proyecto de restauración. La gestión del ecosistema, la educación ambiental llevada a cabo, la concienciación de los técnicos de la administración y de la clase política,… valieron, además, para que en playas próximas se comenzasen a llevar a cabo experiencias de restauración dunar por parte de administraciones municipales que vieron en el proyecto de Fontaíña un ejemplo a seguir."

Voluntariado ecolóxico na praia de Fontaíña-Maio 2013

O pasado 23 de maio 7 voluntari@s da asociación Fontaíña e unha monitora levaron a cabo unha xornada de traballo na praia de Fontaíña.

A actividade consistíu na recollida de lixo na zona das dunas, revisión do valado e tarefas de eliminación de especies exóticas invasoras (Arctotheca calendula, Conyza sp. e Parthenocissus quinquefolia).

O bo tempo acompañou e ao final se apañaron un total de 8 bolsas cheas de lixo e plantas arrincadas.

Actividade de voluntariado ambiental na praia de Fontaíña

O vindeiro xoves 23 de maio de 2013 pola mañán ( de 9:30 a 12:30) vaise realizar unha actividade de voluntariado ambiental.  As persoas participantes levaran a cabo tarefas de conservación do medio natural das praias de Baluarte e Fontaíña (na parroquia de Coruxo, en Vigo).  Se realizará unha limpeza de residuos da praia e mailas dunas, controlarase a presenza de exemplares de margarida do Cabo (Arctotheca calendula), unha especie exótica bioinvasora e se revisarán posibles desperfectos nos valados de protección das dunas destes areais (para posteriormente avisar ó Concello de Vigo coa finalidade de que sexan reparados).

As persoas interesadas en participar na actividade teñen que inscribirse enviando o seu nome e tfno de contacto ó correo da asociación fontainhavigo@yahoo.es ou mediante sms ó móbil 670457222.

O lugar de encontro dos participantes será na pasarela de baixada á praia que hai no lugar de Breadouro (Coruxo), á dereita da praia do Vao (se ollamos caro ó mar).

Resumo de actividades: censo de aves en paso prenupcial

Un total de sete voluntarios acompañados polo monitor de Fontaíña percorreron o litoral vigués o pasado sábado pola mañán realizando un censo de aves en paso prenupcial.

Nova actividade: Censo de aves do litoral de Vigo en paso prenupcial

O vindeiro sábado 6 de abril, pola mañán (de 9 a 13h) se realizará o censo de aves en paso prenupcial do tramo de costa que vai dende Cabo de Mar ata Toralla, pasando pola Xunqueira do Lagares.

O lugar de encontro será en Cabo de Mar (no extremo leste do paseo de Samil) as 9:00h.

O número de prazas é limitado (7 voluntarios/as)

Nesta actividade os participantes irán acompañados por un ornitólogo e axudarán a identificar e contar as aves que se atopen no seu percorrido. Dita información sirve para coñecer o estado medioambiental deste tramo de costa.
As persoas interesadas teñen que apuntarse no tfno 679457222 ou por correo electrónico fontainhavigo@yahoo.es (é recomendable levar prismáticos e roupa e calzado axeitado para o tempo invernal)

Convocatoria de actividade de voluntariado ecolóxico: Plantío forestal nos Mtes. de Teis. Anímate a participar¡

 

Sábado 16/2/13. Programa Devesas do Sur: Plantío forestal de árbores autóctonas nos Montes Comunais de Teis.

NECESITAMOS VOLUNTARIOS/AS PARA PODER REALIZAR A PLANTACIÓN

Os participantes nesta actividade acometerán tarefas de reforestación do monte mediante a plantación de árbores autóctonas (carballos, bidueiras,…). As tarefas forman parte dun ambicioso programa de recuperación do bosque autóctono nos montes de Teis (Vigo)

Pode participar calquera persoa adulta e aqueles menores de idade que estan acompañados e supervisados por un familiar que se faga responsable deles.

A Comunidade de Mtes. de Teis aportará as arboriñas, preparará os terreos, disporá persoal especializado que supervise a laboura dos voluntarios, dará lubas e avituallamento ós participantes. A Asociación Fontaíña facilitará ferramenta e seguro de RC e accidentes para participantes inscritos no seu cupo de prazas.


Data: Sábado 16/2/13   Horario: 9:45-13:00 h. 
Nº de prazas disponibles: 15.

Lugar de encontro: Praza dos Leóns, a carón de Vigozoo. (A liña de autobús C9B chega ata alí).

Xeito de inscribirse na actividade:

• Envío dun correo electrónico a fontainhavigo@yahoo.es cos datos personais do participante (nome e tfno de contacto)
• Chamar/enviar sms ó tfno 679457222 indicando os datos personais

O Proxecto de Recuperación dos Montes de Teis.

A comunidade de Montes de Teis leva a traballar na recuperación do bosque autóctono galego dende hai máis dunha década, sendo unha das súa maiores metas a substitución progresiva da acacia negra, introducida masivamente nos anos 40 do século XX, como especie de rapidísimo crecemento coa a idea de ser utilizada nos encofrados da construción. O experimento resultou ser un auténtico fracaso ao ter esta madeira unha resistencia pésima ós axentes atmosféricos, após administración deixou os montes inzados desta especie sen facer o mais mínima tentativa para combater a súa expansión.  

 O seu maior problema é o rápido crecemento, o que non dá oportunidade ás especies arbóreas autóctonas para poder competir en igualdade de condicións, acontecendo o mesmo coa fauna e o resto da flora de todo tipo. Non interaciona con esta, sendo os bosques de acacia en moitísimos casos desertos verdes, moi lonxe da vida e diversidade que se ve representada nas nosas fragas.

O proceso de substitución desta especie cara un modelo autóctono é moi custoso e cheo de dificultades. O maior problema radica que despois da curta, moi lonxe de producirse a eliminación, dáse unha multiplicación dos seus troncos e un aumento do seu vigor , precisase dunha combinación de diferentes estratexias , así como unha planificación polo miúdo, para ter éxito nesta empresa e sobre todo moita paciencia .

Neste proceso a plantación de frondosas autóctonas, que co tempo darán a sombra, é elemento esencial para combater a acacia negra.

As especies a plantar son tres: como eixo principal o carballo, especie de lento crecemento mais esencial no bosque autóctono, sendo acompañado pola cerdeira e a bidueira, tamén autóctonas pero de mais rápido crecemento. As arbores plántanse a chou tentando imitar a natureza.

 

A Comunidade de Montes de Teis pretende, con este clase de actos, dar a coñecer o noso proxecto de converter o monte da Madroa nun referente de monte periurbano, con moitas posibilidades no eido da educación medioambiental.

Para esta plantación cóntase novamente coa colaboración da Asociación Fontaiña e cidadáns que tamén de xeito independente participan nesta iniciativa.
 

O Paseo de Samil, asolagado pola area

Que imaxe (a superior) e que nova (neste enlace) máis clarificadora publica o Faro de Vigo na súa edición dixital do 27/1/13.

A natureza quere recuperar o que é seu e os temporais deste inverno (por fin un inverno como os de antes, con mal tempo a fartar) son os que envían a area onde debe estar, nas dunas.  O problema é que as dunas están cubertas polas losetas.  A ver se os politicos locais, autonómicos e nacionais toman nota.  Poden ir a cabo de Mar a inspirarse...

Programa de actividades de voluntariado medioambiental da Asociación Fontaíña

Deseguido, na táboa inferior vos expoñemos o programa de actividades de voluntariado ambiental que a Asociación Fontaíña ten previsto realizar durante 2013:

ANO 2013: Programación xeral actividades Fontaíña
Mes	Nome da actividade
Xaneiro	Censo de aves.
Febreiro	Bricovoluntarios* en Cabo de Mar. Programa “Devesas do Sur”*: Plantío de árbores autóctonas nos Mtes. de Teis
Marzo	Obradoiro* na Xunqueira do Lagares. Educación ambiental en centros escolares: “Xogamos coas enerxías renovables”
Abril	Censo de aves. Educación ambiental en centros escolares: “Xogamos coas enerxías renovables”
Maio	Bricovoluntarios* na praia de Fontaíña. Roteiro Formativo: río Eifonso Educación ambiental: Preparación da exposición VozNatura
Xuño	Inspeccion ambiental na Xunqueira do Lagares. Educación ambiental: Preparación da exposición VozNatura Xuntanza de avaliación co voluntariado.
Xullo	Operación Cabicha*: limpeza das praias de Fontaíña e Baluarte.
Agosto	Operación Cabicha: Reparto de cinceiros nas praias de Fontaíña e Baluarte.
Setembro	Acción Ríos Vivos: Limpeza de lixo no río Eifonso Censo de aves
Outubro	Roteiro Formatívo: Restauración de ecosistemas (visita ó bosque de Ridimoas-Ribadavia-)
Novembro	Bricovoluntarios* en Cabo de Mar Obradoiro* na Xunqueira do Lagares.
Decembro	Xuntanza de avaliación co voluntariado.

Nas actividades sinaladas cun asterisco* poderán participar menores de 16 anos sempre e cando veñan acompañados dun adulto que os supervise.

O xeito de inscrición para calquera actividade será mediante: 

• Envío dun correo electrónico a fontainhavigo@yahoo.es cos datos personais do participante (nome e tfno de contacto)
• Chamar/enviar sms ó tfno 679457222 indicando os datos personais

Realizaremos unha convocatoria das actividades deste programa cada dous meses.

Proximo plantío forestal nos Mtes. de Teis. Anímate a participar¡

 Acábanos de chegar unha invitación para participar nunha plantación de árbores autóctonas nos Montes de Teis, organizada por dita Comunidade de Montes de Teis.  Trátase dunha entidade cunha longa traxectoria a prol da defensa e recuperación dos bosques autóctonos e coa que temos colaborado en anteriores ocasións.

Xa realizaremos unha convocatoria oficial pero todas aquelas persoas voluntarias que desexen participar o vindeiro 16 de febreiro pola mañán poden preinscribirse polas canles habituais: correo electrónico fontainhavigo@yahoo.es cos datos personais (nome e tfno de contacto) ou chamar/enviar sms ó tfno 679457222.

Os menores de idade poderán asistir sempre que veñan acompañados dun familiar que os supervise.

Contamos coa tua asistencia¡¡¡

Novidades en relación á declaración do ENIL Vao-Baluarte

Publicamos esta nova aparecida na edición impresa do Faro de Vigo (26/12/12) na que se informa da valoración feita pola Consellería de Medio Ambiente (Xunta de Galicia) das alegación feitas pola Asociación Fontaíña ó proceso de Declaración do Espacio Natural de Interese Local (ENIL) "Dunas do Vao-Baluarte".
Polo de agora non temos comunicación oficial da administración autonómica que conforme esta información.