Convocatoria de actividade de formación: Roteiro ornitolóxico pola Xunqueira do Lagares

 

O domingo 8 de novembro pola mañá (de 9 a 12,30h.) realizarase un roteiro de observación de aves pola Xunqueira do Lagares.

A Xunqueira do Lagares é unha marisma situada na desembocadura do río Lagares que, apesares de non ser moi extensa en superficie, presenta unha variedade de especies de aves bastante salientable no contexto do municipio de Vigo. 

Pódense observar distintas especies de ardeidas, limícolas, gaivotas, o picapeixe, aves rapaces así como paseriformes de zonas marismeñas, agrícolas e forestais.

Polo seu fácil acceso e variedade de hábitats resulta un lugar idóneo para iniciarse na observación de aves.

O lugar de encontro e remate do roteiro será o polideportivo municipal de Samil ás 9:00 h.

O número de prazas é limitado (25 persoas acompañadas por dúas persoas monitoras).

Para esta actividade é imprescindible apuntarse previamente, mediante o envío dun correo electrónico a 

fontainhavigo@yahoo.es 

indicando os seguintes datos:

Nome participante/s

Tfno. de contacto

Os menores de 16 años deberán participar acompañados dun adulto que se faga cargo deles;  os menores de 16 a 18 anos poderán participar sós previa autorización dos seus pais ou titores (Enlace descarga documento autorización).

Lugar de encontro: Polideportivo municipal de Samil (Avda. de Samil, 32, Vigo).

A asociación aportará un par de telescopios e algúns prismáticos pero sería recomendable que aqueles participantes que teñan posibilidade de facelo traian os seus binoculares. Por tratarse dunha actividade de formación de voluntariado, todos os/as participantes contarán coa cobertura do correspondente seguro de RC e accidentes.

Recoméndase levar calzado axeitado para camiñar polo campo no inverno e roupa cómoda. O roteiro é circular, duns 3km de lonxitude e dificultade baixa.

1-11-26. Resumo da limpeza Libera 1m2 na Xunqueira do Lagares

O domingo 1-11-26 pola mañán un grupo de 10 persoas voluntarias participaron na xornada de limpeza de residuos na Xunqueira do Lagares.  

A actividade formaba parte das nuemrosas limpezas de "basuraleza" que se fixeron ó abeiro da 10ª convocatoria "1 m2 contra la basuraleza" que organiza o Programa Libera.

En total se recolleron 15 kg de lixo na marisma, deles 3kg de residuos voluminosos, 8kg de lixo, 3kg de vidro reciclable e 1kg de envases reciclables.

Agradecemos a todas as persoas que participaron o seu esforzo e colaboración na defensa da Xunqueira do Lagares.

1-11-26 Convocatoria actividade "Libera 1m2" na Xunqueira do Lagares

DESCARGAR PDF CARTEL ACTIVIDADE

O vindeiro domingo 1 de novembro de 2026, de 10.00 a 12:00 horas, a Asociación Fontaíña organiza unha actividade de voluntariado ecolóxico na Xunqueira do Lagares. Realizarase unha limpeza de lixo deste interesante espazo natural vigués.  A Xunqueira do Lagares é unha marisma situada na foz do río Lagares. Trátase dun humidal de grande valor ecolóxico, refuxio de numerosas aves migradoras. Ademais, ten valor histórico pola presenza dos restos dunha salina do SXVIII.

Por desgraza, a Xunqueira do Lagares presenta diversos problemas medioambientais. Un deles (e hai moitísimos máis) vai ser combatido mediante o traballo do voluntariado ambiental. A presenza de residuos sólidos, tanto polas enchentas do río como polas pleamares e as saídas de materiais polos sumidoiros, polo que resulta necesario retirar regularmente dito lixo para evitar que se acumule degradando unha zona de enorme importancia natural a nivel local.

A actividade forma parte da campaña a nivel nacional "LIBERA 1m2: NATURALEZA SIN BASURA", un proxecto de SEO- Birdlife e Ecoembes.

Poderá participar calquera persoa interesada, inscribíndose previamente, e a Asociación Fontaíña facilitará luvas, peto identificativo, auga e avituallamento; ademais de contar cun seguro de RC e accidentes. Para esta xornada haberá 20 prazas de voluntariado acompañados por 2 monitores.

Para participar nesta actividade é imprescindible apuntarse previamente, mediante o envío dun correo electrónico a 

fontainhavigo@yahoo.es 

indicando os seguintes datos:

Nome participante/s

Tfno. de contacto

Os menores de 16 anos deben de vir acompañados por unha persoa adulta e os menores de 16 ata 18 anos traer esta autorización dos seus pais ou titores.

Lugar de encontro: Paseo do Lagares (banco dos carballos) na estrada Muíños-Samil. 

É recomendable levar botas de auga e roupa para traballar e mancharse. Chuvasqueiro ou gorra de sol según a meteoroloxía.

Entrevista de Fontaíña na revista dixital El Asombrario & Co de Público

 

Acaba de publicar a revista dixital El Asombrario&Co unha entrevista cun representante de Fontaíña. Neste enlace podedes acceder á entrevista completa.

20-9-26. Resumo da actividade eliminación de espigas da herba da pampa na Xunqueira do Lagares

O domingo 20 de setembro pola mañán, un grupo de persoas voluntarias participou nunha actividade de eliminación de flora exótica invasora na Xunqueira do Lagares.

O obxectivo da actividade era eliminar as numerosas espigas dos exemplares que aínda quedan da planta coñecida como plumeiro ou herba das pampas, de nome científico Cortaderia selloana. 

Trátase dunha especie de planta exótica (orixinaria de America do Sur) de marcado caracter invasor que está incluída no Catálogo Nacional de Especies Exóticas Invasoras e sobre a que se están realizando programas e experiencias de erradicación e control en diferentes lugares e por parte de distintas entidades e administracións (p.ex. MITECO).

A asociación Fontaíña leva a cabo, desde hai anos, traballos de control e de erradicación deste especie invasora, con resultados positivos. Na actualidade, aínda hai exemplares en terreos perimetrais á marisma (con algún exemplar aillado na zona húmida). O obxectivo é a súa erradicación nun prazo de tempo de 1 ano.

Na actividade realizada, as persoas voluntarias eliminaban as espigas dos exemplares que florecen na fin do verán para evitar que sigan inzando o terreo. As espigas logo se gardan en bolsas e se eliminar no contedor xeral de lixo. Retiráronse unhas 150 espigas e tamén 7 exemplares plantas de tamaño pequeno e 1 mediana, esta última florecendo no medio da marisma.

Tamén se aproveitou para limpar os carteis e eliminar un grafiti. Un deles tiña unha pintada que deturpaba o nome da Xunqueira do Lagares polo de "Junquera do Lagares"; curiosamente, con posterioridade alguén corrixiu o topónimo cunha nova pintada. Por sorte, os carteis coidados por Fontaíña contan cun verniz protector que facilita a eliminación rápida de calquera pintada.

Outra das tarefas que xurdiron na mañán foi podar axeitadamente un exemplar de ameneiro (Alnus glutinosa) que tiña varias ponlas baixas destrozadas por un desbroce pouco coidadoso realizado pola empresa municipal que mantén o paseo peonal do Lagares.

Tamén se anotaron varias situacións que serán tramitadas por rexistro no Concello de Vigo, para que as solucione. Presenza de exemplares grandes de herbas da pampa en fincas pechadas municipais e privadas. Por exemplo, na antiga EDAR están agromando de novo os exemplares que arrincou o servizo municipal e deixou alí o ano pasado. No escrito que se fixo daquela se lles insistía na necesidade de cumprir co protocolo "Stop Cortaderia"  que indica a importancia de non deixar exemplares arrincados por acabar revivindo. Tamen pola presenza de un coches aparcado con frecuencia en zonas vexexetación arbórea cercana á praia de samil. Outro asunto é o mal estado da ponte de madeira no río (leva pechada desde xullo) ou os carteis da senda do Lagares. Un deles foi destruido por completo, e iso que xa avisáramos en xaneiro ó Concello de Vigo para que o reparasen, cando aínda tiña remedio o desperfecto. Hai outro que agora volve estar medio inclinado.

A xornada tamén foi proveitosa no que se refire ás observacións ornitolóxicas, pois se puideron observar dous zurrasca euroasiática (Rallus aquaticus), dous picapeixes comúns (Alcedo atthis), varios biluricos das rochas (Actitis hypoleucos), galiñas de auga comúns (Gallinula chloropus), un galo de auga común (Fulica atra), garzas reais (Aredea cinerea) e garza branca pequena (Egretta alba).

Desde a a Asociación Fontaíña queremos agradecer o traballo realizado polas persoas voluntarias, que a pesar da calor que tiñamos nesa mañán se achegaron para axudar e traballar na defensa da Xunqueira do Lagares.

20-9-26 Convocatoria de actividade de voluntariado ambiental na Xunqueira do Lagares

 A Xunqueira do Lagares é unha marisma situada na foz do río Lagares. Trátase dun espazo de grande valor ecolóxico, e que serve de refuxio a numerosas aves migradoras. Ademais, ten valor histórico pola presenza dos restos dunha saíña do SXVIII.

A planta Cortaderia selloana (Herba das pampas) é unha especie de orixe sudamericana que está incluída no Catálogo Español de Especies Exóticas Invasoras.  A planta está presente en Galicia desde os anos oitenta do século XX polo seu uso ornamental. Pouco a pouco os exemplares foron naturalizándose e espallandose polas zonas costeiras ata se converter nun problema pola ocupación de áreas de vexetación natural de valor ecolóxico, como por exemplo as marismas. Actualmente segue a estar presente en numerosas zonas do municipio de Vigo, especialmente en terreos  abertos, baldíos e marxes de estradas. 

A Asociación Fontaíña está a controlar o inzamento desta especie na Xunqueira do Lagares mediante a xeolocalización e eliminación dos exemplares asentados, retirada das espigas para evitar o espallamento das sementes e controlando regularmente as novas plantas que nacen cada ano. Polo de agora os resultados están sendo moi positivos e unha vez que se remate co control da herba das pampas na propia Xunqueira do Lagares se pasaría a unha segunda fase, de inventariado dos exemplares que inzan terreos públicos e privados na contorna e viais que bordean a Xunqueira do Lagares, para reclamar ás administracións públicas que acometan medidas de erradicación.

O vindeiro domingo 20 de setembro de 2026, de 9:30 a 12:30 horas, a Asociación Fontaíña organiza unha actividade de voluntariado ecolóxico na Xunqueira do Lagares, na que poderán participar un total de seis persoas acompañadas dun monitor. Nela se cortaran espigas e se eliminaran algúns exemplares pequenos da bioinvasora herba das pampas (Cortaderia selloana) neste interesante espazo natural vigués. 

Outra das actividades que faremos será borrar as pintadas que teñen os carteis sinalizadores da Xunqueira do Lagares e aplicarlles un verniz protector

A asociación facilitará ó voluntariado a formación previa, ferramentas, lubas, auga e avituallamento, ademais dun seguro de accidentes e de responsabilidade civil. O traballo das persoas voluntarias será dirixido por persoal de Fontaíña. 

Para esta actividade é imprescindible apuntarse previamente, mediante o envío dun correo electrónico a 

fontainhavigo@yahoo.es 

indicando os seguintes datos:

Nome participante/s

Tfno. de contacto

Os menores de 16 años deberán participar acompañados dun adulto que se faga cargo deles;  os menores de 16 a 18 anos poderán participar sós previa autorización dos seus pais ou titores (Enlace descarga documento autorización).

Lugar de encontro: Ponte de madeira do Lagares, na estrada Muíños-Samil. 

ENLACE UBICACIÓN DO PUNTO DE ENCONTRO

O medio no que se vai traballar son terreos con vexetación herbácea alta e bastante seca, polo que é necesario levar roupa de manga e perna longa para traballar protexido no campo.  IMPORTANTE: Para traballar na eliminación da herba das pampas (Cortaderia selloana) é necesario vestir roupas que protexan a pel (camiseta de manga longa e pantalón longo),  xa que as follas desta herba son moi cortantes e poden ferir ou irritar a pel.

9-7-26. Resumo da actividade do inventario de exemplares de herba das pampas na Xunqueira do Lagares

O xoves 6 de xullo pola mañán, un grupo de persoas voluntarias participou nunha actividade de inventariado de flora exótica invasora na Xunqueira do Lagares.

O obxectivo da actividade era localizar, na Xunqueira do Lagares, os exemplares que aínda quedan da planta coñecida como plumeiro ou herba das pampas, de nome científico Cortaderia selloana. 

Trátase dunha especie de planta exótica (orixinaria de America do Sur) de marcado caracter invasor que está incluída no Catálogo Nacional de Especies Exóticas Invasoras e sobre a que se están realizando programas e experiencias de erradicación e control en diferentes lugares e por parte de distintas entidades e administracións (p.ex. MITECO).

A asociación Fontaíña leva a cabo, desde hai anos, traballos de contro e de erradicación deste especie invasora, con resultados positivos. Na actualidade, aínda hai exemplares en terreos perimetrais á propia marisma (con algún exemplar aillado na zona húmida). O obxectivo é a súa erradicación nun prazo de tempo de 1 ano.

Na actividade realizada, as persoas voluntarias buscaron exemplares, os clasificaban en tamaños, sacaban fotos das plantas e as xeolocalizaban. A idea é ir retirando os de menor tamaño no verán nunha proxíma actividade e no caso dos exemplares maiores eliminarlle as espigas este outono, para evitar que sigan inzando o terreo, e posteriomente, con tempo e ferramentas axeitadas, eliminalos fisicamente.

O voluntariado participante localizou na Xunqueira do Lagares un total de 9 lugares con individuos aillados ou grupos, que sumaron uns 35 exemplares, aproximadamente dez deles de talla grande.